وضع الناس في غزة كارثي يا بشر، مؤلم جدا جدا، مأساوي لابعد الحدود،،، ثمن باهظ جدا بيتم دفعه بالقوة، الكل بيدفع ثمن خاوة، راضي
مش راضي، مؤيد او رافض، بدك او ما بدك، مع او ضد، طز فيك مين ما تكون كون، غصب عنك راح تدفع ثمن هائل، موت وخوف
ورعب وتشرد وجوع وعطش واهانة وذل وبهدلة مستحيل حدا يعوضها، مافي اشي ممكن يخفف من وجع الناس، حتى الي بيكابروا على
الفضائيات وفي الاعلام، هدول للاسف مش صاحيين من شدة الوجع، مش مركزين من هول الصدمة، وحجم المصيبة، متونسين بعموم
البلوة وجماعية الكارثة، بكرة هدول راح يقعدوا مع حالهم لحالهم، وراح يبلش حزنهم الحقيقي، الى راح ياكلهم بالبطيء، مين  راح يبرد نار
الام الي فقدت اطفالها او الاب الي فقد اسرته او الناس الي فقدت بيوتها ومالها وحالها، في ناس على باب الله، فقراء وحالهم تعبان من قبل
الحرب، هدول انكشف حسبهم وانفضحوا في الشوارع ومدارس النزوح….. وقفوا الحرب يا عالم، وقفوا جرافة الموت من شان الله، وقفوا
الدمار والخراب، الوقت مش لصالحنا، كل يوم بنخسر بشر، اطفال ونساء ورجال، ناس ابرياء وغلابة ومساكين، ناس طيبين وبسطاء كتير
غاليين على اهاليهم، واغلى من كل الكرة الارضية، اغلى من كل العالم، وحتى لو حررنا الكون كله يا جماعة والله ما راح تبرد نار الناس
الي انحرق دمهم على حالهم، كل يوم بيعدي احنا بنموت اكتر، جثث في الشوارع وتحت الانقاض، والنزيف شلال مستمر، وقفوا النزيف
باي طريقة، اي طريقة، بكفي…. ولا حول ولا قوه الا بالله العلي العظيم …..