حرام عليك تعمل تقييم لحب اهلك الك وعطاء اهلك الك وانتماء اهلك الك والتزام اهلك الك اثناء الحرب وهما تحت النار وماكلين زفت, هما زيك
ويمكن اكتر منك, واقعين في نفس المصيبة, وبشربوا من نفس الكاس, ونزلت على روسهم نفس الكارثة, خسروا بيوتهم وخسروا مالهم ويمكن
خسروا ارواحهم كمان, والنفسيات مش زي بعض, ولا قدرات التحمل لدى البشر متساوية, في بيخافوا اكتر, وفي بينضغطوا اكتر, وفي بيشعروا
بالاحباط واليأس اكتر منك ومن غيرك, عشان هيك, بتكون ظالم ومفتري لما تقعد اتعد على اهلك اخطاء وهفوات , هيا في الاساس خارجة عن
ارادتهم, وتقعد تحسب الهم تقصيرهم وتتصيد الهم الكلمات والمواقف والافعال وهما تحت الضغط الهائل, تحت النار, قاعدين في جهنم, وكأنهم
بيقصروا معاك من وسع, والجماعة مرخرخين بس ما بيحبوك, او حابين يقصروا معاك, لا يحبيبي, نفسيتك المريضة وشيطانك اللئيم هو الي
بيحكيلك هالحكي, حاول تتذكر الهم الحسنات وتضخمها, وما تتذكر الهم السيئات وتبهرها…. اهلك بشر, والاصدقاء تبعينك برضو بشر, والناس
الي حضرتك متأمل فيهم فوق اللازم برضو بشر, بيحسوا وبيخافوا وبيتعبوا وبيرتبكوا وبيشعروا بالاحباط واليأس زيهم زي اي نوع آخر من الكائنات
الحية الطبيعية, يعني مش ملائكة, ولا اساطير خارقة, ولا جمادات بلا روح, ولا كائنات من خارج حدود المنطق والمعقول, ومش لازم ينتحروا
عشان يثبتوا الك انهم بيحبوك بس الظروف صعبة والدنيا مسكرة في وجوههم والكل ماكل زفت….. المشكلة عندك انتا يا صاحبي, انتا بتتطلب
منهم فوق طاقتهم, ولانك مغمض عينيك عن ظروفهم ومش شايف الا حاجاتك واحتياجاتك, ما رح تشوف شو هو مستوى طاقتهم, و رح تظلمهم,
ورح اتفكرهم قصروا في حقك, وخانوا العهد والوعد, وانتهكوا حدود الله فيك, وطلعوا زبالة وبلا اصل وبلا مروءة وبلا نخوة وقد كفروا بما انزل على
محمد….., انتا يا صديقي بتطلب منهم في الحرب اشي شبه مستحيل, وبدك ما يظهر منهم اي علامات اعتراض او تردد او انزعاج… في
الحرب يا جماعة ما حد يعتب على حد, ولا حد يلوم حد, ولا حد يقيم حد, الله العالم بظروف الناس, الداخلية والخارجية, احنا في حرب, حرب
اجرامية مرعبة, زي يوم القيامة, فيها تذهل كل مرضعة عنما ارضعت, وتضع كل ذات حمل حملها, وترى الناس سكارى وما هم بسكارى, ولكن
اهوال الحرب ومخاطرها والعذاب والخوف والرعب والمصايب الي فيها مهوووولة جدا, وخارج حدود قدرات البشر, ومش من المنصف ولا من العدل
ولا من الادب ولا من الاخلاق ولا من الوفاء انك تقعد تعقد مقارنات وتنصب موازين ومعادلات ومحاسبات ومشانق للاهل والاصدقاء الي ما
اعطوك شو بدك,,, التمس لهم الاعذار, وصفي نيتك تجاه ناسك, واقصد رب البشر مش البشر, وما تترك حالك للحقد والكره الي ممكن يهد حيلك
ويعذب قلبك ويدمر علاقاتك بالناس الي بتحبك, وما كانت بتقصد انها تقصر معاك بالمرة