لما حدا من محيطك يشكيلك ويبكيلك من وضعه وظروفه اوعك تصده او تصدمه من خلال رد الشكوى بشكوى مضادة، حرام لما يجيك يشكي تقمعه من خلال تذمر وغضب معاكس وتقعد تشرحله عن حالك البائس وانك اسوء منه ووضعك ازفت من وضعه وانه بيتدلع او مزودها، او انك مش ناقص قرفه ومش قادر تسمع الو، انت بهيك يا صديقي بتكون كسفته ضمنيا، ودمرته بزياده وزدت حزنه حزن جديد بدون ما تلاحظ، اه والله، الي اجاك يشكي يا عزيزي ما اجاك من فراغ، اكيد بكون متعشم فيك وشايف فيك الحضن الدافي الحنون وسط كل هالخشونة وهالقسوة الي عايشين فيها، شايف فيك الامل بكلمة طيبة، رؤية من زاوية مختلفة لمشكلته، نصيحة مفيدة، توجيه معين، مشاركة بالاحساس والشعور، استئناس بالراي والافكار، يعني ما قصدك لانك اي كلام عنده، او لانه شايفك تافه، كمان شغلة مهمة، الي بيلجأ الك بيكون اقرب الناس الك، يعني مش من الشارع، او انسان طارئ في حياتك، هدول اخوك، امك، اختك، بنتك، ابنك، عمتك، خالتك، صاحبك، وما وصل بيهم الحال للشكوى الك الا لما طفح الكيل معاهم وبدهم حدا يخفف عنهم وجعهم، بدهم يتعلقوا فيك، رغم انك ماكل زفت زيهم، ووضعك مش افضل منهم، الا انك مجبر الهم وواجبك تجاههم انك تخفف عنهم عقد ما تقدر، لانهم باختصار اخر بقايا الوطن تبعك، بعد ما انهدم كل الوطن على روسنا، هدول يا صديقي اخر بلدك، اخر ناسك، اخر شعبك، اخر حدا ممكن تثق فيه وتتطمن الو، ولو في يوم انتا الي وقعت او انأذيت راح تلاقيهم فورا حواليك، وسيبك من اكم واحد ما بيقدر او ما بيصون، هدول قلة وما بيمثلوا الكل… حبك لاهلك يا صاحبي وعطفك عليهم ادخار للزمن في حسابك، ووجودك جنبهم في محنهم جمدة الك في رصيدك، وصدقني يا غالي راح تدور الايام كما هي عادتها، وراح تلاقي حالك في يوم مخنوق ومقهور وبدك تحكي مع حدا يخفف عنك وجعك قبل ما تنفجر، وساعتها تخيل تلاقي الي قصدته بيغرقك بقرفه وحزنه وغضبه، احنا يا صاحبي مضطرين نتعكز عبعض هالفترة الكندرة الي عمرنا ما تخيلنا حالنا نمر فيها، مضطرين انلملم شظايانا وشقفنا ونحاول انرمم كل الصدوع الغائرة والجروح العميقة المؤلمة الي دبحت قلوبنا، انا بعرف انو مش سهل الي انا بطرحه، لكن للاسف مافي منه مفر، ما ضل النا بدائل، حاولت خلال فترة الحرب الاقي بديل للناس عن الناس، وفي النهاية ما لقيت، هادي اختك لمين تروح، وهادي امك لمين تشكي وجع قلبها، وهادا ابنك وين يبكي ويظهر ضعفه وانكساره، وهادي بنتك لمين تكشف وجعها وانهيار اعصابها؟؟؟ هدول اسرتك، وطنك الاخير، في ظل تخلي كل الكون عنا، هدول سكنك لما كل الكائنات تركتك تنسحق بدون اي ذنب وبكل حقارة دون اي رد فعل حقيقي يسكن وجعنا ..في هالوقت، ما ضل النا الا احنا، ما ضل يوقف معانا الا تراحمنا وتعاطفنا مع بعض، بكفي الكفر والاجرام الي بيتمارس علينا، بكفي القهر الهائل والظلم السميك والخذلان الحالك الي ضربونا فيه، ما بدنا نزيد الوجع بوجع منا، ما بدنا نبكي بسببنا، نغضب من بعضنا، ونزعل منا فينا، الله يعدي هالفترة على هيك، من غير مزبد من الحزن والقهر والغضب…..

كان الله بالعون وحسبنا الله ونعم الوكيل…