رسالتي للكائن الخارق الي ما بيعجبه نحزن او نبكي او نصرخ من فظاعة الي شفناه…..شوف يا عزيزي, ما هوا اذا انت تمساح من غير مشاعر او احساس انا مش زيك ابدا, واذا انت برضو من اسمنت او حجار وما بتحس وما بتتأثر فأنا مش لازم اكون زيك ابدا, واذا انتا كمان مستوى التقوى والخشوع والايمان عندك وصل لمرحلة تخليك بليد ومتجمد, وخلق عندك تبرير لكل الوجع المحيط ابك وخلاك تتقبله بشكل عادي وتتجاوزه بدون رد فعل منطقي, فانا عكسك تماما, والامور عندي بتيجي بشكل مختلف كليا, انتا يا بطل ما بيفرق معاك ذل امك واهانة مرتك واسرتك في خيم النزوح وفي الشوارع بين المحترم والسافل، والقاصي والداني. وبهدلت خواتك على طوابير الحمامات كل يوم عشان يقضوا حاجتهن، وانكسار ابوك وكرامة عمك ومكانة خالك وجوع اولادك الحافيين والي اكلهم المرض وفقر الدم، والذل والاهانة والرعب والخوف الي شافوه لاكتر من عشر شهور أنا هذا بيفرق معايا كتييييير، فوق ما بتتخيل، فوق كل مستويات وطنيتك المزيفة وكل معتقداتك المضروبة ومشاريعك والخراريف الي في راسك…..دخيل الله انا, دخيل الاسلام… يا زلمة اذا انت ما بتهزك دموع الاطفال وملامحهم المرعوبة انا بتهزني, اذا انتا ما بتحركك صرخات النساء المكلومات وهنا مصروعات على اولادهم المقطعين انا بتخلع قلبي من مكانه, اذا انت ما بتأثر فيك مشاهد القتل والدمار والجثث في الشوارع وموت اولادك واهلك واصحابك الي بينك وبينهم عشرة عمر انا بتحرق دمي وبتدمر نفسيتي وبتبكيني طول الوقت وما بتخليني اعرف انام الليل, افهم يا بشر… انا مش زيك, مش زيك يا حجر, مش زيك يا بلاستك, انا مش زيك يا اسمنت, انا انسان طبيعي جدا, وما بعرف اخبي مشاعري وردود افعالي, ولما بنكسر خاطري ما بيخطر على بالي شو رأي الاعداء فينا, ولا بفكر امثل على حدا واظهر ما لا اشعر… لا لا لا لا انا انسان طبيعي جدا وبلاقي كل الي حواليا زيي, الا حضرة جناب راسك المربع, انا لا متخاذل ولا خاين ولا مثبط ولا مهزوم, واذا انت ما بتعرفني فهذه مشكلتك انتا مش مشكلتي انا, ومش راح احاول اعرفك مين انا, وخود بالك كمان انا مش مرق ولا مايص ولا رخو ولا ضعيف, زي ما مخك المريض بيحكيلك, بس انا انسان طبيعي جدا جدا, بزعل وقت الزعل، وبتأثر وبحزن وبنقهر وبيصيبني الاحباط واليأس زي اي انسان طبيعي, وهل تعلم اني ببكي زي ما الرسول محمد ما بكى, اذا انت مسلم وبتآمن بيه, ومش مسموح الك مين ما كنت تكون انك تمنعني من الحزن والسخط والغضب, وما بيطلع الك تمنعني من الصراخ والبكاء والدموع والنحيب كمان, انا مش زيك بالمرة, انت الي مختلف، انت الي كائن آخر, اشي ما بيشبهني بالمرة, اقسم بالله انك ما بتشبهني, ولا بشوف حالي فيك, ابدا ابدا, انت اشي تاني, جسم فارغ من كل معاني الانسانية, اشي خارق جدا, وقاسي وناشف ومستحيل, انا لا يا عزيزي, انا مش هيك, انا عادي جدا, وطبيعي جدا, ضعيف زي باقي البشر, زي اي كائن حي مش ميت زيك، انتا الي تجاوزت بسلوكك حدود المنطق تبعنا, وبعدت عن المعقول الي تربينا عليه, اشي ما بقدر افهمه, ولا بقدر اتعاطى معاه, ولا ممكن يحصل بينا تقارب او انسجام, فخليك في مكانك يا خارق وانا بدي اضل في مكاني, امارس مع حالي وامثالي عفويتي الآدمية، وما راح اجيلك ولا بدياك تيجيني, ولكم دينكم ولي دين…..الانسان الطبيعي / أحمد هشام حلس