عارفين لما بوقف لحدا في الشارع وأنا سايق سيارتي وبيمرق من قدامي من غير شكرا او حتى يعبرني, والله العظيم بنقهر وبيصيبني إحباط مش طبيعي,,, أرجوك يا صاحبي لما يوقف الك حدا سايق سيارته ويعطيك فرصة تقطع الطريق من قدامه بأمان أعطيه إبتسامة خفيفة وإرفع إلو إيدك وحييه على عمله الطيب تجاهك, اه أشكره بكل حب, هو إحترمك, وقدرك, وعطل حاله عشانك, لا تتخيل حجم الأثر الإيجابي إلي راح تتركه في نفسه, إنت هيك راح تصنع الو يومه, صدقني, وراح تشجعه يعملها دايما, وبهيك بنصير نتبادل التحيات والاحترامات, وإبتسامة مع إبتسامة من هادا ومن هادا راح إنخفف على بعض قرف الوضع العام والظروف الصعبة إلي بنعيشها ولو شوية..

لما تكون ماشي في الشارع وتخبط حدا بكتفه او تخبط على رجله او توقع أغراضه او تعمل أي إشي غلط في حقه, أرجوك إعتذر, أه إعتذر, إحكيله مع إبتسامة إستجداء وإستعطاف أنا آسف يا صديقي, صدقني راح تمسح كل الغلط تبعك فورا, وراح تفتح معاه صفحة جديدة, ويمكن تصيروا أصحاب, إنت هيك بتتصالح مع حالك, وبتشتري راحة بالك, وبتعالج الندبات النفسية إلي ممكن تحصل إلك, والله لما بتعتذر للناس إلي بتغلط في حقهم بقصد أو من غير قصد, ربنا بيرضى عليك قبل رضى البشر, غير السلام الداخلي إلي راح تعيشه مع حالك, لغة الإعتذار يا جماعة بتضمن التعايش السلمي بين الناس صدقوني, اكبر مشاكلنا في البلد إلي خسرنا فيها ضحايا كانت ناس ما إعتذرت لناس…..

اياك صديقي تشتري من بياع معرقل السير أو مسكر الطريق بالكارة او بالعرباية تبعته او بالكشك تبعه, هذا الإنسان بيزعج الناس عشان يبيع ويربح, صدقني إنت هيك بتشجعه على عمله السافل, وبتعطيه تأييد انو يستمر, يعني بتكون شريك الو في أسلوبه المتخلف, وبتضمن استمراريته في تخريب حياة الناس, أه والله, عارف لو كل بياع شوارع, عرف حقوق الطريق والمارة والناس, وأدرك انو البيع مرتبط بوقفته الصح وأسلوبه الصح, وميكريفونه الصح, كان عدل سلوكه وإتحسنت شوية حياتنا….

لما تكون راكب سيارة أو ماشي في الشارع ولقيت حدا بيرمي زبالة في الطريق ما تسكت, نهائيا ما تسكت, أنا ما بحكيلك إعمل معاه طوشة, لالالالالا, أنا شخصيا عمري ما سكتت لحدا بيعمل هيك, وفي نفس الوقت عمري في حياتي ما عملت مشكلة, أه والله, حاول تلفت انتباهه بكل أدب ولياقة, إنو إلي عملته مش عمل محترم, وإنك بتسيئ إلنا كلنا, وبتهين كل الناس وكل تضحياتهم عبر تاريخ ثورتنا, بعملك القذر هادا, إنت وقفه, وإحكيله بكل حب مع ابتسامه خفيفة استنكارية “إنت راجل محترم وإبن ناس وشكلك مؤدب ليش بتعمل إشي مش محترم وحرام ومتخلف زي هيك؟؟؟”, صدقني هالرسالة راح تخليه يعيد حساباته مليون مرة قبل ما يكرر هالفعل مرة تانية, وبهيك ممكن تنضف شوارعنا اكتر واكتر, هادي اسمها الرقابة والمتابعة المجتمعية, يعني المجتمع بيراقب المجتمع, والمجتمع بيعاتب المجتمع, فالمجتمع بيعدل نفسه, وبيلفظ السلوكيات الزفت مع الوقت….

لما تشتري إشي من السوق أو من الشارع, أرجوك يا صديقي ما تفاصل صغار الباعة, ولا تتشاطر على البياعين الغلابة والمساكين, ضمة بقدونس, حزمة فجل, ربطة جرجير, مقص أضافر, حبة فستق, كيس ترمس… الخ الخ الخ, مش مستاهل هالشيكل, تكسر خاطره عشانه, أعطيه من باب الصدقة يا أخي, وخليه ينبسط, أعطيه بزيادة, صدقني ربنا بيزيدك من فضله, وراح تلاقيه في حياتك, هادي إسمها البركة, بتلاقيها في صحتك في مالك في عيالك في علمك في سمعتك في مستقبلك, ما في إشي بيضيع عند ربنا عز وجل, الجزاء يا صديقي من جنس العمل, ممكن يكون جاي خراب للاب توبك أو جوالك أو سيارتك راح يكلفك 150 شيكل وربنا جنبك إياه لأنك جبرت خاطر أبو الجرجير, طبعا حق 300 ضمة جرجير أو فجل أو بقدونس من إلي فرحت صاحبهم الصبح لما اشتريت منه وأعطيته خمسة شيكل بدل 2 شيكل…..

لما تكون راكب في تاكسي أو بتنتظر دورك في بنك أو في أي مؤسسة عامة ويجيك إتصال, عيب والله عيب ترد بصوت عالي, وتزعق وتهلل وتصرخ وتبرم وكأنه ما في حدا جنبك, إنتا هيك بتهين الناس, وبتختطف كل إلي حواليك معاك في اتصالك, وبتقتحم عليهم خصوصيتهم بكل وقاحة, وبتشغلهم فيك, بتوقف تفكيرهم في حالهم, وبتلغي وقتهم وبتسرقه لصالحك بكل قلة أدب, إزعاج وتوتر وتضييع لوقتهم, وهذا الإشي طبعا مش من حقك…

لما تتداين من حدا مصاري, وتتلخبط أمورك وما تقدر تسده في الوقت المتفق عليه, إياك تقل ادبك معاه, أو تقعد تتشرود منه وتطنشه, أو تبطل ترد على جواله, واجهه بكل شرف ورجولة, تنساش انو وقف معاك بكل حب وثقة في وقتك الصعب, تنساش شهامته ونخوته رغم ظروفه الصعبة برضو, كلنا مساتير بعض, يعني بنساعد بعض من “اللحم الحي”, ما بينفع إنعض الإيد إلي بتنمد إلنا, إتحمله حتى لو زنق عليك ولو الح عليك, في الأول وفي الآخر هادا ماله, وإنتا إلي أخليت بالعهد, إنتا إلي ما التزمت الو, عشان هيك ضلك اتصل فيه, كل شوية, وطمنه حتى لو زعق عليك, ضلك اعتذر الو واجتهد لسداده, ربنا بيجبر خاطرك وبيقدرك من غير ما تجرح صاحبك إلي وقف معاك…..

في كتير سلوكيات وتصرفات في حياتنا مش تمام وصدقوني بتكون أحيانا سبب في قهرنا وتخريب حياتنا وكسر خواطرنا, ممارسات في حياتنا تراكمها بيهد حيلنا, راح أحاول أرصدها والكتابة عنها خلال الفترة الجاية بلكي اختفت من حياتنا وصارت الحياة افضل, مهما كانت هادي التصرفات صغيرة, إلا انو عددها الكبير بيخليها هائلة الوزن ومؤلمة ومعقدة, لا تحقرن صغيرة إن الجبال من الحصى يا صديقي….

الله يجبر خواطركم جميعا أصدقائي الأحباب ويسهل حياتكم ويجعل فيها الخير والبركة, أقول قولي هذا واستغفر الله العزيز لي ولكم